كيف بنحسب قوة كلمة السر؟
أغلب المواقع بتقلّك "قوية" إذا فيها حرف كبير ورقم ورمز، بس هاد مضلّل: P@ssw0rd1 فيها كل هالشروط وهي من أول الكلمات اللي بيجربها أي مهاجم. الأداة هون بتفكّر متل المهاجم: بتدوّر على الكلمات الشائعة، والأسماء، والكلمات العربية المكتوبة على الكيبورد الإنجليزي (متل hgsghl = السلام)، والتسلسلات متل 123 وqwerty، والسنين والتواريخ، وبتحسب كم محاولة بيحتاج ليوصلها، وبعدين بتحوّل عدد المحاولات لوقت حسب نوع الهجوم.
ليش في كذا وقت للاختراق؟
- عبر الإنترنت: المهاجم بيجرّب على صفحة الدخول نفسها، والمواقع المحترمة بتقفل الحساب أو بتبطّئ بعد كم محاولة غلط، فحتى كلمة سر متوسطة بتصمد.
- بعد تسريب: لما تنسرق قاعدة بيانات موقع، المهاجم بيجرّب على جهازو بدون حدود. هون بيفرق كتير إذا الموقع كان حافظ كلمات السر بتشفير بطيء أو سريع، وإنت ما بتعرف شو بيستعمل الموقع.
الأوقات تقديرية لمهاجم بيعرف الأنماط الشائعة، مش ضمان. وإذا كلمة السر تسرّبت قبل من أي موقع، بتنكسر فوراً مهما كانت قوية، لهيك ما تكرر نفس كلمة السر بأكتر من موقع، واستعمل برنامج لحفظ كلمات السر، وفعّل التحقق بخطوتين.
خصوصيتك
الفحص كلو بيصير بمتصفحك بملف JavaScript صغير، وما في أي اتصال بالشبكة وقت الكتابة. ما بنحفظ كلمة السر، ولا بنحطها بالرابط، ولا بنبعتها لأي خدمة فحص تسريبات.
أسئلة شائعة
- ما هي كلمة السر القوية؟
- كلمة سر طويلة (12 حرف عالأقل) وعشوائية، ما فيها اسم أو كلمة معروفة أو تاريخ أو تسلسل، ومش مستعملة بأي موقع تاني. جملة من 4 أو 5 كلمات عشوائية كمان خيار قوي وسهل التذكّر.
- هل كتابة كلمة السر في هذا الموقع آمنة؟
- الفحص بيصير بجهازك بس وما بتنبعت كلمة السر لأي مكان. ومع هيك، الأفضل تجرّب كلمة شبيهة بكلمتك بدل كلمة السر الحقيقية، وهاي نصيحة لأي موقع فحص.
- هل كتابة كلمة عربية بالحروف الإنجليزية بتخليها أقوى؟
- لأ. كتابة "السلام" على الكيبورد الإنجليزي بتطلع hgsghl، وهالحيلة معروفة وموجودة بقوائم المهاجمين، فالأداة بتكشفها وبتعاملها متل الكلمة العادية.
- كم يحتاج المخترق لكسر كلمة سر من 8 أحرف؟
- إذا كانت عشوائية تماماً من 95 حرف ورقم ورمز، فعدد الاحتمالات حوالي 6.6 مليون مليار. بمعدل 10 مليار محاولة بالثانية (بعد تسريب بتشفير سريع) بتخلص كلها بحوالي أسبوع، وبأجهزة أقوى بساعات. وإذا كانت كلمة أو اسم، بتنكسر بثواني.
